中環出更：田少父女情深享受滑雪樂
咪以為新婚夫婦先嚮往二人世界，旅發局主席田北俊都恨到出面，但佢另一半唔係太太，而係千金田啟安（Andrea）。兩星期前，佢哋結伴去日本二世古滑雪，此行只有父女兩人，謝絕其他人做電燈膽。
新年去北海道未盡興
田少好恨阿女陪佢滑雪有原因，話說農曆新年時，田少一家包括Andrea、女婿同埋佢最痛錫嘅外孫晉仔暢遊北海道滑雪。孫仔有御用教練，但田少同千金唔放心，全程喺山頭跑上跑落，佢哋陪晉仔坐吊車上山，又陪佢滑落山。陪太子讀書後返香港，田少同Andrea傾起，至發現原來幾日以來陪住個心肝寶貝，兩人根本冇滑過雪。由於技癢，喺夏季來臨前，一定要去多一次。
趁日本仍然凍凍哋，兩父女兩星期前去多轉北海道，頭尾五日，今次冇咗個小小電燈膽，佢哋今次終於盡興而返。
卓妮