中環出更：雷禮權「十八銅人」造型曝光
九巴董事雷禮權（William）早前為慈善，扮行會成員梁智鴻（金刀梁）維妙維肖，引為城中佳話。原來「金刀梁look」並非William首選，佢嘅心水係扮「十八銅人」多啲，其實佢已經試咗一次妝，點知突然收到前民政事務局常秘媽打李麗娟急call，佢「奉召」扮梁醫生，銅人造型惟有珍藏喺iPhone手機內畀自己欣賞。
William扮銅人「不求人」，自己郁手化妝，早前佢現身香港會食飯，急不及待向卓妮展示從未曝光嘅造型。佢話呢個妝化足兩、三粒鐘，多得太太利蘊珍借出深色粉底及閃粉眼影。
花兩粒鐘化妝
William皮膚白滑，上妝無難度，佢將閃粉鋪滿面部、肩膊同埋頭頂髮絲，再搽埋黑色眼影加深輪廓，效果媲美荷里活特技化妝師。正當William拍板以呢個造型亮相之際，媽打突然來電，提醒佢要扮金刀梁。
William於是計計數，化銅人妝要花兩粒鐘，一晚轉兩個妝實唔夠時間，William最後梳咗個中間分界妝，自備一棚假牙，疊埋心水扮金刀梁算嘞。不過William唔悶得，晚宴當日再帶多一個假髮，笠喺中間分界頭出面，方便佢戴上超大羽毛禮帽扮紳士。扮得咁投入，皆因William鍾意扮靚喎。
佢同卓妮講，當年留學英國，已穿梭各大名牌掃靚衫，家中衣櫃盡是Prada、Gucci和Armani，令人眼花繚亂。不過人大咗，反而鍾意搜尋冷門名牌，費事同人撞衫喎。
William仲有另一嗜好，就係翻新舊屋，不時喺日本及英國發掘有潛質嘅物業，翻新後出租，卓妮讚佢有生意頭腦，William卻笑言：「我唔當係一門生意㗎，係嗜好至真，因為我鍾意靚嘢。」
卓妮