政情：胡文新撐小伏幫大陸解水荒
內地鬧水荒，雲南、貴州、四川、廣西壯族自治區同重慶市嘅降雨量只有平均年雨量嘅一半，存水差唔多耗盡，超過六千萬人受影響。身為小母牛愛心大使嘅伏明霞，尋日喺一項活動上接受合和實業董事總經理胡文新嘅捐款時，不忘介紹佢哋小母牛除咗送禮物之外，都有教農戶儲水，好似青海省咁，經常畀欠缺潔淨食用水嘅問題困擾，所以小母牛就幫佢哋建立一個社區飲水系統同供水系統。
教仔女慳啲「洗」
雖然香港暫時未受旱災之苦，不過無理由臨渴先掘井，所以小伏平時都積極同大女司渝、二仔皓嘉仲有就嚟兩歲嘅細仔James灌輸環保慳水之道，佢自己亦身體力行做到足。好似佢尋日出嚟活動前幫James沖涼，用完啲水都無嘥，攞嚟拖埋浴室塊地先倒啲水，咁積極做身教，相信三個小朋友都唔會亂玩水。