政情：蘇菲梁環保唔飲膠樽水

蘇菲同我哋講，佢唔飲樽裝水，係覺得膠樽始終唔環保。一直秉承「少浪費」原則嘅蘇菲，為咗「慳得一樽得一樽」，由二十年前開始已經自己帶水樽出街，就算迫不得已要買嘢飲，都盡量避免買樽裝飲品，實行為環保盡一分力。

不過蘇菲都強調，唔係批評賣樽裝水嘅商人，只係鼓勵大家平時環保啲喎！

低碳飲食 一舉兩得

蘇菲另外一個環保之道，就係低碳飲食，佢話近幾年早餐轉食有機燕麥，再用生果或者果仁伴碟，貪佢唔使點煮，既慳能源又可以消脂，一舉兩得。蘇菲仲將呢個習慣感染埋身為香港足總主席嘅老公梁孔德，佢話梁孔德近年都食多咗田園沙律，實行兩夫妻一齊身體力行撐環保咁話！