中環出更：賀胞弟新婚 陳振聰繼續暴瘦Look
捲入已故華懋集團主席龔如心遺產案嘅商人陳振聰，上月就涉嫌偽造文件案第三度向警方報到時，以一身暴瘦Look示人，之後一直未有露面。卓妮收到風，陳振聰胞弟陳振鴻（Bobby）尋日新婚之喜，喺港島香格里拉酒店香島殿筵開約二十席，即刻去八卦吓。原來今次係由律師黃國桐主持證婚儀式，陳振聰帶同太太譚妙清及細仔都有現身，而三弟陳振田及四弟陳振國亦有出席婚宴。
清減皆因有keep fit
尋日下午五時許，卓妮見新郎哥Bobby乘坐一架七人豪華Van抵達酒店，佢見卓妮在場都好愕然，想落車但又縮回車內，但最後都落車步入酒店。卓妮上前恭喜Bobby新婚之喜，仲問佢胞兄陳振聰會否到場，佢就臉有難色話唔係咁清楚，然後急步入酒店。直到傍晚六時許，終於見陳振聰同太太及細仔到場，陳太見到卓妮無乜表情，反而陳振聰繼續笑臉迎人。
陳振聰無露面一個月，尋日依然保持暴瘦Look。佢話清減咗係因為有健身keep fit，經常喺屋企跑步，希望身體健康啲。問佢點解近期咁少曝光，佢就話：「唔係，都有成日出去食吓嘢嘅！」陳振聰又為弟弟成家立室感到高興，問佢送乜嘢禮物畀弟弟，佢就話係秘密，希望留番個驚喜畀弟弟喎。龔如心遺產案上訴聆訊將於明年一月進行，問陳振聰心情如何，佢都係嗰句，以平常心面對。
獲邀賓客當中，包括曾經喺遺產官司中代表陳振聰嘅律師麥至理，仲有已離開宏霸數碼嘅周白瑾。卓妮喺港格等候期間，竟然遇上華懋慈善基金代表律師何文基，但唔知佢去邊度，真係世界真細小，小得真奇妙！
卓妮