中環耳目：方文雄滋陰歎隆濤院燕窩
貴為「福布斯」富豪方潤華公子嘅中總副會長方文雄（David）原來每餐無甜品不歡，新寵係粵菜館「隆濤院」嘅椰汁燉燕窩，喜歡佢滋陰養顏，難怪David皮膚滑不留手。
出身大富之家嘅David平日作風低調，衣着樸素，但講到食，就絕不吝嗇。David笑言係為食之人，想食就食，佢話趁依家體魄強壯唔使戒口，食乜都冇避忌。
尖沙咀由舊水警總部翻新嘅1881，有一間酒店叫做Hullett House，「隆濤院」就係喺酒店內，稱得上係古蹟內嘅富貴飯堂，食物主打懷舊菜式，連失傳咗嘅鴨掌包都難唔倒總廚。David喜歡喺百年古蹟下歎番一盅兩件，再來一客燉湯或一碗椰汁燉燕窩，咁就滿足到極嘞。
除咗鍾意「搵食」，David亦熱心為政府出謀獻策，去年牽頭搞智庫「群策學社」並擔任主席，呢排進行一個有關老人商機嘅研究報告，好快有結果。香港正面對人口老化問題，只要轉吓腦筋，危機隨時變商機。
卓妮