政情：陸志聰想重建瑪麗

現任為醫院管理局九龍東聯網總監嘅陸志聰醫生（ＣＣ）即將調任港島西聯網總監，兼做聯網龍頭瑪麗醫院新「一哥」，佢對瑪麗嘅好多嘢都睇唔過眼，認為間醫院又殘舊又落後，佢心入面已有重建大計，不過佢又呻話瑪麗附近想搵撻空地都好難，院內又有幾幢已經列為古蹟嘅歷史建築一定唔拆得，如果要重建，就一定要再動腦筋。

ＣＣ尋日同記者講，今個月廿六日係最後一日以九龍東聯網總監兼聯合醫院總監身份返工，雖然佢喺五月最後一日至去瑪麗履新，但係都無得抖，事關佢廿九日朝早會同醫管局主席胡定旭同行政總裁蘇利民去浩園拜祭沙士殉職醫護人員，跟住就即刻飛去倫敦，考察當地嘅教學醫院運作，逗留三日之後，再飛去美國哈佛大學修讀兩個月高級管理學課程。