政情：郭少明未圓打吡夢

矚目馬圈嘅Mercedes-Benz香港打吡大賽，尋日喺沙田馬場一決高下。馬匹「極品絲綢」爆發驚人潛力奪冠，捧走近九百三十萬元巨額獎金，印度馬主喜上眉梢；股壇名人莊友堅嘅「威利旺旺」跑第二，莎莎國際主席郭少明嘅「締造美麗」就跑第四。

郭羅桂珍（左）有馬出，好友梁王培芬（右）都嚟撐場。 （溫國佳攝）
郭羅桂珍（左）有馬出，好友梁王培芬（右）都嚟撐場。 （溫國佳攝）

十四匹四歲馬競爭打吡賽寶座，莎莎老闆娘郭羅桂珍悉心打扮陪老公入場，郭老闆更預告贏頭馬就捐出獎金做善事，可惜「締造美麗」跑梗頸四，只得七十五萬二千元獎金，再次同打吡夢擦身而過。

愛駒「精密紡」出戰，陳永棋（後排左起）罕有地帶埋太太、千金、女婿及兩個孫嚟打氣。 （葉華英攝）
  • 愛駒「精密紡」出戰，陳永棋（後排左起）罕有地帶埋太太、千金、女婿及兩個孫嚟打氣。 （葉華英攝）

陳永棋有孫萬事足

尋日馬場仲有另一位稀客，就係全國政協常委陳永棋，棋哥拖埋太太、千金、女婿及外孫捧愛駒「精密紡」場，可惜四甲不入，棋哥話輸馬好閒，下次玩過，梗係喇，身邊有六歲男孫Sean及三歲女孫Jane氹氹轉，正所謂有孫萬事足，唔拉頭馬好閒啫。