中環耳目：鄭文雅愛上印度乳酪Lassi
前港姐鄭文雅（Olivia）轉型做高球教練，月前去咗印度扶貧，順便慶祝五十歲生日。印度咖喱出名香、辣兼備，但Olivia嫌一日三餐食咖喱，膩到極，寧願叫杯印度乳酪（Lassi、小圖）醒吓胃。
Olivia早前着上購自印度嘅民族裙，出席老友朱玲玲攝影展，印度風情揮之不去。佢話，三星期印度之行感受良多，走訪多條村落大派文具及衣物，令村民非常感動。Olivia又遇上一位印度新娘正在出嫁，靈機一觸攞起相機為對方留倩影。
講到食，佢首推印度咖喱羊肉最正，可惜餐餐吃咖喱，幾攞命，Olivia發現Lassi味道清新有驚喜。Lassi係一種源自北印度嘅消暑冷飲，由無味乳酪、水同香料混合而成，分為原味、鹹味及甜味三種，印度人習慣喺用餐前，來一杯Lassi清清口腔，更能品出香料嘅真味。Olivia愛上原味Lassi，飲到唔停得口。喺香港，專營印度菜嘅餐廳都有Lassi飲品賣，心思思的話，不妨去歎番杯。
卓妮