中環出更：黃進達接班 爸爸做軍師

卓妮初次接觸三十出頭嘅Jason，感覺佢性格內斂和謙厚，同佢父親直腸直肚嘅招積性格判若兩人。黃老闆都大讚囝囝話：「Jason好謙虛，做事夠圓滑，唔似我咁多牙齒印，但我招積有理喎！」隨着Jason逐步接班，黃老闆亦慢慢退居幕後做囝囝嘅軍師，只係就重大事情畀意見，係時候歎吓世界。不過，Jason對接掌康泰，唔多唔少都感到壓力。

常去五個地方唔會out

Jason坦言，過去十幾年，香港經歷金融風暴、沙士及金融海嘯，對旅遊界衝擊好大，加上業界競爭大，令經營更困難。不過，Jason話爸爸有先見之明，多年來一直有買舖頭，好似現時喺金鐘統一中心嘅三萬幾呎大本營，就係○三年沙士肆虐時買落，當年以八千幾萬買入，依家升值數以倍計，亦慳番唔少租金。Jason話佢亦會繼續開闢新旅遊路線，開拓內地市場，繼續省靚「康泰」個招牌。

入康泰七年，Jason出團或搵新景點，令佢踏遍嘅國家增至五十多個，但佢話父親教落，只要經常去五個地方就唔會out，包括香港、東京、新加坡、紐約和倫敦五個資訊發達同繁榮嘅城市。

去年Jason以六百五十一票歷來最高票數，當選為旅議會理事，打響名堂，但康泰贊助港姐更令佢聲名大噪，同新鮮出爐嘅港姐冠軍陳庭欣傳出緋聞。Jason就呼冤話，完全無啲咁嘅事；為粉碎謠傳，黃士心篤爆囝囝已經有個固定嘅靚靚女朋友，當年仲係城大校花，喺城大修畢會計後就入咗一間大規模嘅會計師樓工作，已經有晒結婚計劃，睇怕黃老闆都飲得杯落！

黃進達早已鋪定路接班，畢業後隨即入康泰做嘢；左起媽咪、細佬、黃士心、黃進達及細妹。 （黃進達提供圖片）

黃進達經常一家五口出外旅遊，至今已走遍五十幾個國家。