中環出更：四叔壽宴期望兒孫滿堂

福臨門到會

每逢春寒料峭嘅三月，四叔慶祝生日總引起城中一陣騷動，不過四叔生日只宴請至親嘅人，例如親屬、老友同埋恒基總經理級以上嘅高層。尋晚大約六時許，賓客陸續抵達惠苑。本身係會計師嘅范太囝囝范駿華（Andrew）嘅出現頗令人意外，原來范太喺北京未能親自到賀，故派Andrew前往。不過Andrew係百仁基金成員，同擔任基金主席嘅四叔囝囝李家傑做善事有共鳴，大家梗係愈嚟愈啱傾嘞！

約七時十五分許，徐子淇乘坐賓士座駕抵達，佢悉心打扮，盡顯雍容華貴。冇耐福臨門嘅專車駛至，同往年一樣，四叔都係鍾意叫佢哋到會服務。福臨門顧客多為城中富豪名人，四叔都係臨福門嘅常客，對佢哋嘅菜式自然有信心。

有份出席壽宴嘅賓客形容，四叔精神爽利，心情靚爆，佢嘅生日願望係「身體健康，兒孫滿堂」，似乎又向千億新抱施壓！現場氣氛喜氣洋洋，尤其是兩位着住藍白色公主裙嘅孫女可愛活潑，搶晒壽星公爺爺嘅風頭添！

賓客又形容尋晚好好餸，有火瞳翅、二十五頭吉品鮑魚，仲有官燕糖水，福臨門出品果然係唔同啲。聽聞尋晚四叔宴客出手都唔低，每圍要三萬幾、四萬元，係名副其實嘅豪門夜宴，一眾賓客到夜晚十時三十分才盡興而歸。卓妮都祝四叔壽比南山啦！

徐子淇（中）盛裝同老爺賀壽。

范駿華親自揸車參加豪門夜宴。 （葉華英攝）

卓妮