政情：蔡堅憂愛巢被強拍
發展局提出降低舊樓強制拍賣門檻引起激烈爭議，連醫學會前會長蔡堅都有意見。蔡醫生尋日打電話上電台訴苦，擺明反對降低強拍門檻，話自己身受其害。原來佢住喺太子道間屋已經有三十年，而太太四十年前已開始喺度住，依家有啲業主想大地產商嚟收購，逼其他人支持，一齊賣樓。
蔡醫生話當然唔贊成，因為幢樓維修過，每戶夾十幾廿萬，依家好好哋又話要賣；如果降低門檻到唔夠八成業權支持都話得，咁好容易畀人得逞！
蔡醫生愈講愈勞氣，擔心被人迫遷後，要貼多幾百萬或者一千萬先買到樓，想喺太子道買番間更難，所以佢話不能降低門檻，等人哋收購得咁容易。聽蔡醫生咁講，佢間屋原本係太太住開，後來兩人結婚，成為愛巢，住咗幾十年，一定有好多美麗回憶，怪不得佢多多錢都唔會賣。