政情：蔡堅憂愛巢被強拍

蔡醫生話當然唔贊成，因為幢樓維修過，每戶夾十幾廿萬，依家好好哋又話要賣；如果降低門檻到唔夠八成業權支持都話得，咁好容易畀人得逞！

蔡醫生愈講愈勞氣，擔心被人迫遷後，要貼多幾百萬或者一千萬先買到樓，想喺太子道買番間更難，所以佢話不能降低門檻，等人哋收購得咁容易。聽蔡醫生咁講，佢間屋原本係太太住開，後來兩人結婚，成為愛巢，住咗幾十年，一定有好多美麗回憶，怪不得佢多多錢都唔會賣。