政情：80後追緝衝燈唐唐
相信大家對本月六日舉行嘅青年高峰會議鬧劇仍然歷歷在目，當時一批八十後不滿港府假諮詢，不但向唐英年掟鞋，仲一度瞓街唔畀佢架車離開，最後唐唐只能喺交通警開路之下，慌忙衝燈逃亡。事隔一星期，一眾青年仍然未肯罷休，當日有份入場舉牌抗議嘅Ytalk!召集人葉浩意，尋日就喺facebook開咗個「追緝逃犯——唐英年」嘅群組，呼籲當日在場人士提供番唐唐衝燈嘅片段同埋相片，仲炮轟唐唐衝燈閃人，做法低劣兼罔顧安全，揚言收集到證據後不排除會有進一步嘅行動。
當日「一瞓成名」嘅FM101成員黃軒瑋（Anson）憶述，當時佢啱啱瞓低就畀警方抬去對面馬路嘅巴士站，一起身嘅時候就見到唐唐架車衝燈，Anson話都想去追捕唐唐：「佢又唔係好似救護車同警車咁執行緊職務，咁做簡直係違法！」
一班八十後咁樣包圍唐唐，佢哋對造成嘅混亂係咪要負番啲責任呢？葉浩意不以為然話：「人民要求同唐英年對話，佢唔肯不特止，仲衝燈走人，個責任應該係佢負！」警察公共關係科就話，當日係警方為咗盡快恢復公眾秩序，由警察電單車開住警號、喺確保道路安全下引領唐唐座駕離開，根據法例可以獲得豁免。一句講晒，各有各講！