政情：阿涂王國興維園互片
喺處理八達通出賣顧客個人資料圖利事件中化身「私隱鬥士」嘅工聯會立法會議員王國興，尋日喺《城市論壇》上同民主黨涂謹申互片，搞到現場觀眾情緒高漲。
事緣王國興最初一直話會用《立法會（權力及特權）條例》去徹查呢件事，後來因為得到港鐵承諾改善，同時採取幾項改善措施，最終撤回要求，而涂謹申眼見就算提出動議都唔夠票通過，決定唔再提出成立專責委員會。佢兩個尋日喺論壇碰面，阿涂話立法會喺件事上冇做到底，王國興就反駁已經逼到港鐵承擔責任，反而阿涂喺內會收番自己個建議，唔明佢咩意思。
任亮憲乘機抽水
阿涂之前已經喺立法會議案辯論同內會兩次狙擊王國興，尋日聽到王國興咁講即時質疑工聯會都冇出席內會，認為佢哋講就無敵、做就腳軟。王國興即時搶咪駁斥，工聯會當日有出席內會，阿涂咁講係抹黑，話腳軟嘅係阿涂先啱。
「維園阿哥」任亮憲之後加入戰團，話兩位議員上演咗一幕保皇黨爭相邀功嘅鬧劇。唔知佢兩個聽完有咩感覺呢？