中環出更：好友開蠔吧肥亨念舊撐場
尖沙咀新地標iSQUARE食肆愈開愈多，卓妮有晚就見中策集團主席馬時亨現身iSQUARE，幫襯廿八樓一間叫AMBROSIA Oyster Bar & Grill嘅蠔吧，究竟有乜菜式連肥亨都吸引到呢？原來AMBROSIA其中一個股東Gary，以前喺稻菊日本料理工作過，佢嘅殷勤款客態度令肥亨大為讚賞，難怪Gary榮升老闆，肥亨都念舊去撐場打氣。
肥亨多年來幫襯過唔少食肆，尤其同啲有潛質兼服務周到嘅夥計特別投契，賓客變朋友，即使呢班「朋友」過檔或自立門戶，肥亨都念舊去幫襯，除咗Gary外，由海都海鮮酒家過檔到銅鑼灣「飯堂」嘅「玲姐」譚綺玲，殷勤服務同樣令肥亨食得放心，「飯堂」變成佢嘅家常飯堂。
當晚Gary親自為肥亨悉心安排一頓豐富晚餐，頭盤係西班牙伊比利黑毛豬火腿配蜜瓜，一客生蠔拼盤，包括鮮甜嘅美國熊本蠔（Kumamoto）、澳洲Smoky Bay、法國頂級Gillardeau及富濃郁海水味嘅Belon 0000（銅蠔）。肥亨最鍾意法國Gillardeau，仲「柯打」多幾隻食夠本，呢種蠔會先喺美國養殖四年，再運到法國作最後養殖，吸收天然養分，分外肥美。
望陳志雲積極面對
至於主菜就有炭燒龍蝦仔配香蒜牛油汁、鮮蝦辣茄汁扁意粉、炭燒美國安格斯肉眼扒配香草牛油及薯仔，款款各具特色。
甜品部分，Gary安排咗「焗迷你蘋果批配雲呢拿雪糕」，肥亨試後大為讚賞，成餐飯食得好滿意。肥亨話，好開心見到Gary做出成績，仲開支靚紅酒同Gary飲番杯。
肥亨兩年前患上腦血管畸形病離開政府，尋日佢出席講座時，透露兩年激減十八磅，成功消滅「三高」，即高血壓、膽固醇及三脂甘油酸，中風機會降低，成為十年來健康上最大成就。
對於無綫總經理陳志雲涉嫌貪污被捕，上過《志雲飯局》嘅肥亨話，作為朋友都覺得好唔開心，希望陳積極面對，亦會為陳祈禱。
卓妮