中環出更：蔡加讚獎自己買限量林寶堅尼
玩具大王蔡志明囝囝蔡加讚（Karson）一直幫爸爸打理生意，涉獵範疇包括地產、玩具不等，即使農曆新年去拉斯維加斯旅行，一樣要兼顧嗰邊生意。不過work hard之餘都要play hard。即使無得玩，買架玩具氹吓自己都興奮。
記得舊年蔡生送咗架二千萬嘅林寶堅尼獎勵Karson，辛苦咗一年，今年Karson花錢自己買；雖然架車只係蔡生送嗰架嘅三成價錢，但用自己血汗錢，點都爽啲！
售價逾六百萬
呢架Lamborghini Murcielago LP670-4 SuperVeloce全球限量350部，賣六百一十萬元左右，Karson買嗰陣香港只返咗百幾部，所以愛車如命嘅佢慳啲使都要買番架收藏。架車最大馬力去到670匹，由靜止加速到100公里只需3.2秒，最高速度仲可以去到時速342公里，齋睇呢啲數字，卓妮都feel到耳仔邊頭髮被吹起。
Karson話爸爸嗰架啱收藏，呢部可以落地揸，可惜時間所限，買咗成個星期只揸過一兩次，Karson話帶呢架車返屋企嗰日，第一時間叫阿媽睇，點知蔡太唔敢坐去兜風，實情係佢怕個仔揸快車，所以Karson承諾唔會做飛車黨，尤其喺香港，一定會安全守法，事關香港揸極都無落賽道片咁過癮。不過為免父母擔心，落到賽場佢都只係自己玩唔同人鬥，依家仲心思思想運架車去賽道揸，可惜呢排係做廠旺季，到八、九月都走唔甩，惟有寄望年尾行得開。
卓妮