一九九七年香港率先爆發禽流感，奪去多條人命，九八年政府提出中央屠宰建議，周一鑊信誓旦旦話中央屠宰勢在必行，政府軟硬兼施，動用六億元推行家禽業界自願交牌計劃，不少業者感意興闌珊，陸續交出牌照。目前市面上活雞檔買少見少，逢年過節，買活雞搶崩頭。家陣活雞在市場所佔比例只有百分之五，約萬多隻，另外百分之三十是冰鮮雞，其餘百分之六十五是急凍雞。
政府已成功改變了市民的飲食習慣，愈來愈多人接受冰鮮雞和雪藏雞。周一鑊在立法會上表示：基於禽流感爆發的風險已大減，政府對中央屠宰的計劃可能有變，其潛台詞無非係就咁胎死腹中。之不過，佢又擺姿勢話要等顧問公司研究。昔日交回牌照的檔主，頓有被賣豬仔的感覺，有雞販甚至擬告政府違反對業界的承諾。民無信不立，呢啲就係社會深層次矛盾的來源，周一鑊有份製造也！
一個中央屠宰議足十二年還未拍板，還要惺惺作態又「顧問」又「研究」，真係「雞若有情雞亦老」，周一鑊必定晚晚飲老雞燉螺頭老火湯，難怪處事如此滋陰補腎。周一鑊話「禽流感風險大大降低」，請問有冇調查研究？是否甲型流感再現高峰期的機率大些？現階段係！猶幸政府英明，訂了三百萬劑打了未夠二十萬劑，甲型流感再闖十次高峰都未驚過。
遲的快不了，人生雖冇幾多個十二年，之不過周一鑊未肯講到明：真不幸地禽流感又崔護重來，屆時大家再商議中央屠宰有其必要未遲也！如此這般又議而不決十二年，食物及衞生局局長真不是人幹的。