騎士拔刺破魔咒
好多人話騎士係勒邦占士一人球隊，但事實證明騎士冇咗「大帝」一樣掂，昨日騎士喺勒邦占士及奧尼爾雙雙缺陣下，加上占美臣因傷退下火線，但最終憑將士用命，主場以九十七比九十五，兩分之微險勝馬刺。
自○七至○八年球季開始，騎士喺勒邦占士缺陣嘅九場賽事全部落敗，估唔到今次面對強敵馬刺竟然可以打破宿命贏波。今場得分最多球員係馬刺嘅真路比利，佢攻入今季最高嘅三十八分，不過，騎士喺完場前九秒憑莫威廉士射入兩個重要罰球，最終以兩分之差反勝馬刺，取得今季第五十場勝仗。
真路比利大嘆馬刺捉到鹿唔識脫角：「可以作客贏騎士嘅機會唔多，今場佢哋有三名主力缺陣，但我哋都把握唔到，輸波真係好唔抵。」
小牛屠「狼」締12連勝
不過，目前ＮＢＡ狀態最好嘅球隊首推小牛，小牛昨日以一二五比一一二擊敗木狼，取得十二連勝，目前僅落後湖人，穩坐西岸二哥位置。
馬利安今場獨得二十九分及十四個籃板，表現最為搶鏡。小牛將於明早主場出戰籃網，力爭十三連勝。
本報綜合報道