中環出更：馬詩慧添秋裝貼潮流有眼光
秋風起，又係時候換新裝。啱啱喺上海行完騷返嚟嘅王敏德名模太太馬詩慧（Janet），雖然已經有三個小朋友，不過依然無同「時裝」脫鈎，仍舊係一個好「衣架」。早兩日卓妮見佢去中環ifc置裝換季，前後廿五分鐘就試齊中、短褸，仲即時扑錘買嘢。
用廿五分鐘掃貨
所謂「春江水暖鴨先知」，馬詩慧除咗行騷，亦有幫手搞騷，所以潮流興咩，佢絕對在行。不過佢唔係好贊成盲目跟風，事關死跟潮流唔代表一定好睇，着衫最緊要睇個人品味。好似佢今次行Anteprima，一入到去，sales已經好識做咁攞本新裝目錄畀佢自己揀，Janet揭兩揭就放低，直接行去衫架度揀。
Janet有對精明眼，一埋衫架就拎起一件冬季大熱嘅圓領千鳥格Cape款羊毛中褸。今年Cape褸又番轉頭，當然唔係人人carry到，名模一併埋身，唔使問已經好有型格，睇嚟呢件一萬零八百蚊嘅千鳥格已經係佢囊中物。試完中褸，Janet轉戰短褸，佢試咗兩件都係四千零六百九十五蚊嘅黑色短褸，搞到Janet十五十六，事關一件係斯文款羊毛外套，因為夾雜咗黑色同銀色線，睇落去件外套閃閃哋。另一件就係衫腳不規則嘅Boiled Wool短褸，睇落Chic啲，而且Boiled Wool夠晒保暖，真係魚與熊掌。
喺舖頭逛咗廿五分鐘，見Janet兩手空空出返嚟，原來啲貨要喺第二間舖運過嚟，所以買咗都無得拎走住。Janet臨走仲醒多個扮靚貼士畀各位女士。佢話今年興高踭鞋，如果淨係着嚟行騷或出席場合都好啲，但如果着出街，除咗對腳唔健康，仲要小心跌死多過病死。名模大師姐果然夠率直！
講番今個秋冬嘅Anteprima，佢哋着重古典設計細節，將「奢華」同「品味」融為一體，喱士花邊嘅細膩手工同懷舊時尚互相輝映，仲有強烈對比嘅輪廓同線條，難怪連Janet也愛上。