政情：徐立之唔知仔心肝
年長一輩好多都話唔明「八十後」諗緊乜。身為「五十後」嘅港大校長徐立之都話，佢同「八十後」嘅兩個仔喺一啲問題嘅睇法上有鴻溝，好似兩個仔年齡差兩年，但喺多倫多大學畢業時，都不約而同選擇剃光頭參加畢業禮以示抗爭。徐校長話真係唔理解兩個仔咁做為乜，可能係無聲抗議佢管束太多，借光頭嚟刺激吓佢啩。
不過，徐校長唔明唔緊要，佢好尊重兩個仔，既然佢哋願意一世人一次嘅大學畢業相以光頭示人，佢雖然唔認同但無反對，亦都無太激咁鬧仔，好彩剃光頭只係表態而非潮流，兩個仔之後都好正經冇再做光頭仔。
徐校長又話，佢對待學生都係一樣，會尊重佢哋有唔同睇法，但係最緊要係提醒佢哋要守法，否則後果自負。最近喺唔同問題嘅抗爭場合都會出現嘅陳巧文都係港大學生，佢因襲警被捕正保釋候查，校長話港大學生事務長就時不時都同陳聯絡，睇吓有無需要幫手。