中環耳目：施榮忻推介Amigo蒙古生牛肉
香港菁英會主席施榮忻（Jaime）平時一個人食飯好隨意，但約朋友聚餐傾偈就會首選跑馬地Amigo（雅谷餐廳），鍾意餐廳環境舒適，食物又美味。Amigo菜式深受名人愛戴，Jaime就推介香嫩蒙古生牛肉，呢味菜選用美國嫩牛柳，先將牛柳切成薄片雪十五分鐘，然後再混入由甜酸瓜、蛋黃、洋葱、芥末等特製醬汁之內，薄牛肉入口香甜嫩滑。
施榮忻又推介Amigo另一招牌傑作酥皮焗蠔湯，湯底係以鵝肝炒香後熬製，然後放入兩至三隻美國生蠔，蓋上酥皮焗二十分鐘，出爐後酥皮香味溢出，個湯又夠鮮味，稱得上傳統又好飲。Amigo嘅湯類有一特色，就係使用火酒爐㷫住啲湯送到客人面前，保證夠晒熱辣辣。另外，Amigo嘅香草蒜子燒春雞亦都一流，芡汁好香濃，唔怪得Jaime每次幫襯都要柯打啦！
卓妮