政情：吳仕福告御狀插邱騰華

煲呔曾前日與十八區區議會正、副主席見面，聽取佢哋對施政報告嘅意見。一如所料，大部分無經過選舉洗禮嘅主席，讚到報告天上有、地下無，只有民選嘅主席敢直言勸諫點醒煲呔曾。葵青區議會副主席麥美娟批評置安心計劃、交通津貼及關愛基金嘅不足後，輪到福哥發言，點知福哥竟將話題扯到將軍澳擴建堆填區問題上，又追問政府對取消委任制嘅安排。

據聞福哥臨場表現神勇，聲言西貢地區人士其實好想同政府合作處理堆填區問題，可惜政府同地區溝通不足，矛頭直指邱騰華無做好諮詢工作。佢又話堆填區問題應該好似興建骨灰龕咁，十八區都有責任幫手解決。講完堆填區，福哥話鋒一轉，又質詢煲呔曾對取消區議會委任制嘅安排，促請政府盡早表態，等委任議員有充裕時間做好參選準備。

煲呔曾回應時唔敢再講堆填區，反指長遠需要興建更多焚化爐，減少垃圾體積，更呼籲各區主席喺呢方面幫幫手，但有關委任制問題佢就詐傻扮懵無回應。施政報告被部分與會者用堆填區問題騎劫咗，煲呔曾一直唔多察覺，到後來才醒起叫大家言歸正傳對施政報告表示吓意見，部分人即時掩住半邊嘴笑，煲呔曾咁，真係多得邱騰華唔少。

邱局長條氣唔順

面對各方批評，邱騰華尋日出席一項肺功能測試活動時表現得好唔忿氣：「都市生活其實少不免有好多唔暢順嘅嘢，唔單止條氣唔順，呼吸有時都未必咁暢順！」其後佢用肺功能測試儀器測試自己肺量，話自己「都係谷谷哋氣」，難為佢講得出。眾所周知，邱騰華上任以來劣迹斑斑，已成為政府負資產；如果仲唔醒定啲，係咪捱得完餘下兩年任期都好難講囉。