中環出更：陳智文情迷Roger Dubuis潛水錶
近排係上市公司公布業績嘅旺季，卓妮喺亞洲金融業績會度，見到平時低調嘅執行董事陳智文（Stephen），佢負責公司嘅投資業務，由於舊年成功捕捉港股嘅升浪，令公司由前年蝕七億幾，扭轉局勢變成賺三億幾，真係抵讚！
方便游水睇時間
卓妮行近恭喜佢，見佢腕間戴住近年極受歡迎嘅瑞士Roger Dubuis男裝錶，作價十幾萬元，同弟弟陳智思愛戴膠表，品味好唔同。Stephen話呢隻係潛水錶，不過佢戴住游水啫！佢鍾意隻錶夠大隻，方便佢喺水中睇時間。Roger Dubuis原來曾經喺Patek Philippe効力十幾年，佢不拘形式嘅獨特設計擄獲唔少名人嘅心，例如萬人迷碧咸夫婦。去年底佢哋正式進駐香港，喺半島酒店開設首間專門店。
Stephen勤力游水身形自然保持得好，啱晒着對身材要求好高嘅Armani西裝啦！Stephen話佢初時搵上環一名上海裁縫師傅度身訂造，但約十年前，太太嫌咁多年嚟訂造嘅款式太死板，所以親自帶佢去街選購，自此佢便成為Armani擁躉。
卓妮