中環出更：兩駒打吡叫胡 郭少明風騷
被視為馬主必爭賽事嘅香港打吡大賽，本月十六日又再埋牙拗手瓜。莎莎國際主席郭少明未開賽先創紀錄，愛駒「締造美麗」及「美麗傳奇」同時獲選參賽，翻查歷史，廿年來未有馬主咁威水。雙倍chance在前，郭老闆講到明恨拉頭馬，梗係喇，總獎金高達一千六百萬元，試問邊個唔心郁？
郭老闆前日同卓妮大談養馬心得，原來佢嘅愛駒先後兩度參加打吡，可惜與三甲無緣。今次捲土重來仲打孖上，點計都着數過人。講贏面，郭老闆話較睇好「締造美麗」，因為隻馬跑法主動，若然排到靚檔位，守住三甲衝線都未定；「美麗傳奇」就愛留前鬥後。邊隻叻啲？要鬥過先知。
親自餵食紅蘿蔔
十四匹馬今次碰頭較量，鬥到咬牙切齒，郭老闆分析話，其他馬匹來頭猛料，唔敢輕敵：「麗豐控股林建康擁有嘅『勇敢小子』喺香港六戰六勝，未輸過；另一匹參賽馬『君子一言』亦係兩戰兩勝。」但論「吸水力」，「締造美麗」過去三年合共贏得近九百萬元獎金，相對購入價僅三十幾萬元，表現有晒交代，難怪郭老闆錫到「締造美麗」燶，幾忙都好，每月一定抽時間入馬房餵「美麗」食紅蘿蔔，連太太郭羅桂珍都話呷醋喎。
養馬十年，郭少明曾斥巨資買入貴價馬，殊不知以平價購入嘅周歲馬反而爆發潛質，「締造美麗」就係最佳例證，今日嘅佢學會以平常心對待賽果：「贏馬一半靠眼光，一半靠運氣，強求唔到」。
講到改馬名，郭少明話愛駒都要靚名裝身，馬名離不開一個靚字，好似「漂亮第一」、「靚得開心」、「終身美麗」等，因為靚名形象鮮明，女馬迷都加分落注捧吓場喎。
卓妮