中環出更（一）：陳啟宗做咗大家樂神秘客戶
恒隆集團主席陳啟宗（Ronnie）有時鍾意去大家樂開飯，幫襯之後仲會寫個電郵畀大家樂主席陳裕光（Michael）講吓飯後感，佢尤其鍾意大家樂旗下「一粥麵」嘅冰鎮奶茶。陳裕光形容，Ronnie係佢哋餐廳尊貴嘅神秘客戶添！
電郵陳裕光品評食物
卓妮早前喺個場合同Michael講起呢件事，佢笑笑口爆料畀卓妮知，話Ronnie「出巡」旗下餐廳後會寫電郵畀佢，講吓叉燒、奶茶水準點樣，好彩多數係讚賞，所以佢都好開心。除咗Ronnie之外，Michael話仲有唔少商業機構CEO都係佢哋客戶。卓妮八卦想知邊個，佢笑謂等人哋自己講啦！
打大家樂呢份工要好醒定，因為嚟食嘢嘅客人太多，唔知人哋係咩背景，好容易踩到地雷。好似Michael都鍾意微服出巡，佢一星期總有三、四次落舖頭食嘢，最常去大家樂同意粉屋，佢話買飛攞食物時，員工通常唔識佢，但坐低後有時有員工認到佢，就會通知經理。
大家咪以為Michael喺大家樂淨係為咗工作，其實佢係真心鍾意食自己舖頭啲出品，尤其喜歡大家樂嘅功夫雞、焗豬扒飯同奶茶。至於意粉屋，佢嘅心水之選係酥皮龍蝦湯、肉醬意粉及焗芝士麵。大家樂集團喺全港有二百五十間分店，按Michael巡舖嘅速度，食足成年都唔使重複添！
大家樂係全球最大中式連鎖餐廳，又持有稻香約一成股份，透過稻香早已滲透中港兩地嘅中式食肆市場。為開拓年輕人市場，大家樂近年開咗好多新品牌中價食肆，Michael仲研究緊開日本餐廳添。睇佢雄心勃勃，難怪香港市務學會都搵佢做榮譽主席，後生仔要多啲向佢偷師啦！
卓妮