中環出更（二）：莊學山戴羅馬錶紀念威水史
戴錶戴足廿年唔捨得換，睇怕無人夠中南鐘錶主席莊學山長情。莊主席同鐘錶淵源深，父親係香港鐘錶大王莊靜庵，自細見盡金勞、鑽錶，偏偏佢返璞歸真，鍾意戴自家出品嘅羅馬錶（ROAMER），貪佢夠薄。
莊主席話二十幾年前製錶技術做到呢個水平，威水到極，好值得憑錶紀念吓。
廿年前超薄款式
莊主席手戴嘅銀色羅馬錶設計簡潔，睇真啲，原來機肉薄到只有一點二五毫米。超薄手錶喺呢個年代無乜出奇，但喺廿年前就係重大革命。莊家當年經銷瑞士樂都錶等，其後收購埋瑞士羅馬錶，此後推陳出新，令羅馬錶風行一時，莊主席話，記得當年內地人稱呼呢個品牌做「大羅馬」添。
時至今日，羅馬錶依然歷久常新，暢銷歐美及內地，每隻錶閒閒哋賣逾萬銀，莊主席手上嗰隻當年只需五千幾銀，如今升值至少逾倍。呢款錶外形正正方方，優雅大方。家族製錶多年，莊學山笑言睇錶都睇到厭，但靚錶易得，美好回憶難求，一於日日戴住羅馬錶，紀念家族威水史。
卓妮