佢兩兄弟好快會碰頭，事關喺警隊工作咗卅七年嘅任Sir下周五榮休，聽日最後一次主持警察結業匯操，任達華會帶埋太太同女兒捧哥哥場。

講開警隊，港區全國人大代表譚惠珠尋日連走兩場，去完友好協進會新春午宴，又趕去警察員佐級協會致詞，佢話元旦日嗰晚，本來安安樂樂喺屋企睇電視，點知見到班八十後衝擊中聯辦，嚇到佢原本挨喺梳化，即刻要坐直睇；過多幾日，又見到班八十後圍繞立法會，嚇到佢即刻坐到梳化邊。佢仲話，衝擊者都係一班大學生、年輕人，令人聯想起中國歷史上一啲唔同睇法嘅事件，但無論點，警務人員都保持克制，為被困人士解圍，做法文明喎。