帶頭捐五百萬

棋哥搞大騷，煲呔曾及多位司局長齊到賀。棋哥預告今年喜事多，年中將舉辦協進會廿一周年盛大晚會，年尾仲請到全國人大副秘書長喬曉陽來港出席「政經論壇」。大計當前，唔少得匯聚四方財力，棋哥帶頭自揼心口捐出五百萬元，多位富豪一呼百應齊齊捐錢。

信置主席黃志祥捐出五百萬、四洲集團主席戴德豐捐三百萬、福建幫頭領盧文端捐二百萬、香港興業主席查懋聲捐一百萬、全國政協委員朱蓮芬及「新金王」黃英豪各自捐出五十萬元，新地非執行董事郭炳湘都認捐咗五百萬，屈指一算已籌到逾二千萬元。

棋哥撲水唔手軟，喺春茗上遇見「深圳王」黃楚標隨即揼心口，叫佢起碼認捐三、四百萬，黃楚標唔敢托手㬹，話同棋哥上京開兩會時慢慢傾。戴德豐都幫手吸財，話籌款無上限，多多益善，有份捐錢嘅盧文端相當鬼馬，笑言呢趟唔係捐錢，係畀棋哥揼咗心口至真。

協進會新竇依家裝修緊，四月開張大吉。棋哥呢位租客面子夠，大業主承諾畀佢哋用埋頂層業主專用宴會廳搞活動，筵開廿幾圍宴客都無難度。