香港教育學院理論上係一個教師訓練基地，專門培養為人師表嘅教育工作者，同學係咪應該知書識禮明辨是非呢？當然應該啦，可惜事實往往同理想有出入，正如你覺得做官嗰一班精英應該係正人君子，點不知隨時係知法犯法嘅違規之徒，最經典例子莫過於負責廉政工作嘅前任廉政專員湯顯明，居然係一個不廉不潔又好酒貪杯嘅醉貓喎，吹脹！
香港教育學院到底出咗乜嘢狀況呢？係咁嘅，部分同學名義上係大學生，不過行為舉止十足十小學雞，開學迎新營大玩無聊遊戲，結果係將珍貴食水白白浪費，非常之咁唔環保。你知啦，供港東江水好貴o架，水務署不斷爆水管已經浪費咗大量食水，身為準教師嘅教院同學仲唔識得節約，滿目瘡痍嘅地球先生會扁嘴o架。
教育學院嘅無聊遊戲大概如此，多個學系嘅學生哥喺操場利用長膠喉接駁水龍頭，你射射我，我潑潑你，進行咗一場幼稚到不堪嘅濕身水戰。喂，校方事前已經表明態度反對相關活動，理由係珍貴食水不容浪費，因乜解究同學仍然一意孤行變身暴殄天物嘅小學雞呢？嬉戲玩樂唔係話唔得，之但係搞到水長流就講唔通囉。大家設身處地諗一諗吖，世界各地唔少貧瘠到極嘅山區窮人，為咗一桶水隨時要徒步行走幾粒鐘o架，堂堂大學生表現得咁麻木不仁，簡直匪夷所思！
講開又講，點解家陣嘅大學迎新營經常闖禍嘅呢？一時又過分淫賤，一時又涉嫌虐待。好似香港城市大學咁吖，前一排有人喺校內民主牆張貼大字報，踢爆媒體及傳播學科聯會嘅迎新營以遊戲為名，做出不人道嘅虐待行為，包括向人掟西瓜以及潑麵粉，受虐人士更加被綁起添喎。大學生千祈唔好以為玩玩下無傷大雅，樂極生悲玩出個大頭佛點算呢？美國德州有一個十歲小妹妹，同一個四歲小弟弟玩玩下，後來被警方拘捕，控告佢強姦罪。香港警方會唔會拘捕大學生控告虐待罪就唔知，至低限度旁觀者會覺得遊戲性質不人道囉。
講番教育學院嗰一筆浪費食水嘅爛帳，不幸中之大幸係其中一個主辦遊戲嘅系會主席事後肯認錯，一方面向失望嘅公眾致歉，另一方面承諾會呼籲下屆莊員取消水戰遊戲。
講到呢度，功夫茶提提大家，每年三月二十二日係聯合國推出嘅「世界水日」，英文叫做World Water Day，每年嘅主旨都係喚醒世人珍惜食水。功夫茶呼籲各位準教師，千祈唔好淪為浪費食水嘅人之患呀！