有民主黨高層坦言，依家白鴿黨嘅處境可謂左右做人難，首先佢哋選擇咗唔同公社兩黨一齊搞「公投」，就預咗流失部分激進泛民支持者。如果最後真係爭取到中央作出某啲讓步，令白鴿黨喺立法會嗰九票可以名正言順「轉軚」支持政改方案，咁都可以箍番部分中間溫和選民支持。不過，如果中央寸步不讓，令佢哋被迫跟埋公社兩黨一齊再次否決政改方案，咁就兩邊都輸到盡。

不斷降價 試圖「轉軚」

為避免出現呢個雙輸局面，白鴿黨最近已不斷將佢哋嘅政改底線同訴求降價，由最初要人大常委會白紙黑字就終極普選方案作出補充說明，到最近改口話只要有中央官員公開口頭承諾，然後由特區政府喺兩個政改決議案嘅前言作出說明，都勉強可以收貨；又話即使因為回鄉證問題上唔到京，由中央派人落嚟香港傾都冇問題，明顯幫緊自己鋪定下台階。

該名高層仲明言，希望中央喺五月十六日五區補選投票日之前作出有關承諾，因為喺正式投票之前，公社兩黨為免流失選票，仲會投鼠忌器唔敢公開勁插白鴿黨，但過咗嗰日，兩黨肯定會將「公投」失利嘅責任推晒畀白鴿黨，將該黨講成出賣港人嘅民主叛徒；到時無論中央作出乜嘢讓步，佢哋都好難再冒險轉軚支持政改。白鴿黨表明會交由會員大會決定係咪支持方案，話啲會員都係睇民意去決定點投票；如果最後民意對有關讓步唔收貨，白鴿黨高層都完全冇符喎。

不過親建制派人士分析，白鴿黨與中央對抗咗十幾廿年，雙方嘅互信基礎薄過蝦餃皮；即使中央作出某啲讓步，白鴿黨一樣可以唔滿意而最後唔認數企硬反對，說到底係缺乏互信。睇嚟呢場政改博弈遊戲仲有排玩落去。