艾佛遜早前復出重投母會76人，眾人都諗住佢會生性做人，點知今月就連番請假缺席操練及比賽，近日76人終宣布艾佛遜因照顧患病嘅女兒而無限期離隊，但「AI」卻冇交代女兒病情。據悉照顧女兒只係藉口，內情係艾佛遜同隊內球員不和，加上不滿上陣時間而再鬧情緒離隊。

冇交代詳情惹揣測

其實艾佛遜早於季初加盟灰熊後，曾試過因為不滿冇正選，一怒之下向球會請假並無限期離隊，估唔到曾揚言甘願打後備嘅「AI」重投76人後又出呢招。

艾佛遜首次請假於明星賽前，當時佢以照顧患病嘅4歲女兒Messiah為理由，連續缺席咗五場常規賽事，又退出明星賽。及後艾佛遜歸隊並參與了三場常規賽，包括周日對馬刺，但尋日76人主席史迪泛斯基就向外宣布，因艾佛遜與家庭商量後認為事態嚴重，為照顧女兒會無限期離開球隊。艾佛遜與太太共育有五名子女。

不滿出場時間太少

因「AI」從冇向外透露女兒病情，加上佢個底又花，所以唔少人都質疑佢講大話。據76人隊內人士透露，實情係艾佛遜抱怨其出場時間太少及球隊戰術唔以佢為中心，令佢起手次數大減而震怒。另亦有傳佢同隊內嘅年輕球員不和而產生內訌。76人有見及此，決定快刀斬亂麻放逐艾佛遜，唔想令其他球員以為可以隨時缺席操練及比賽。

本報綜合報道