「光纖之父」兼前中文大學校長高錕獲得諾貝爾物理學獎後凱旋返港，喺香港掀起抽水效應。先是中文大學喺今個月初搞個慶祝大會邀請高錕出席，繼而高錕母校聖若瑟書院又請咗佢出席開放日做主禮嘉賓。各界連新春都唔放過高錕，上星期四年初五，就輪到馬會邀請高錕去沙田參觀全港首間為老人癡呆症患者而設嘅耆智園。前日高錕又應中大工程學院邀請，同一班工程學院教職員、舊生共進晚餐；經過連日奔波勞碌，高錕前晚終於感到不適，未食飯已經要提早離場，返酒店休息。
有讀者睇唔過眼，向本報投訴中大將高錕當作宣傳工具，被人拉去呢度，拉去嗰度，仲篤爆前日佢出席中大活動時身體不適提前離開。呢個讀者仲批評中大無理會高錕嘅健康情況，更無維護過佢嘅尊嚴，好似任人勞役，淪為一個不能自主嘅宣傳機器，最終搞到高錕身體不適提早離場，令人既心痛又憤慨。
中大發言人並無回應上述批評，只係話口未完，高錕下月十四日又要返中大出席步行籌款活動，支持校方成立高錕獎學金基金。高錕得獎固然值得高興，但佢畢竟係個患病嘅老人家，大家應該畀時間佢休息吓。