下星期日（廿八日）舉行嘅渣打馬拉松破紀錄有六萬人參加，一如往年，不少大學院校都會組隊參賽，今年第二年組隊參賽嘅理工大學喺校長唐偉章領軍下，成功號召逾三千人參賽，擊敗稱霸四年嘅香港大學，勇奪「鼎力支持大獎」，尋日校長仲率領三十幾名師生到場領獎，場面好墟冚！
上任近兩年嘅唐偉章話，今年好開心可以攞獎，最多謝一班教職員好努力咁宣傳培訓，成功號召三千一百零五個學生、老師同校友參賽，比舊年只得六百幾人嘅成績增加四、五倍，尋日佢仲同中文大學副校長鄭振耀一齊試玩Wii跑步遊戲，成功跑畢全程，完全冇喘氣，似乎體能一啲都唔錯。
不過，原來唐校長自己並冇參加比賽，事關比賽嗰日咁啱要去美國羅省出席理大嘅校友活動，而且佢唔係好擅長跑馬拉松，以前未參加過，只係有玩百萬行，仲話自己比較鍾意踩單車。
唐校長見大家玩得咁高興，佢拍心口話，明年或者會考慮參加，試吓跑十公里賽喎。