馬國首相twitter與市民溝通

點解煲呔曾咁快畀人踢爆呢？原來又係衰喺社交網站手上。話說斯里納吉未做首相前，已開始善用唔同互聯網平台同公眾溝通，開設咗twitter同facebook帳戶，仲經常喺twitter同facebook上話畀民眾知自己見過咩人、想做咩事，拉近與公眾距離。今次佢同煲呔曾見完面，十八日（年初五）當晚七點十分就用手機上twitter同市民分享，仲話兩個人嘅會談取得成果，不過就無講見咗幾耐同傾咗啲乜。喺前日嘅報道中，斯里納吉嘅新聞秘書沙里胡丁仲向當地報章表示，煲呔曾還在度假中，佢係非官式拜會。大家想知道兩人傾過乜，睇嚟要問過煲呔曾至知喇。

twitter喺○六年成立，同facebook有少少唔同，只可以同網友以文字分享，屬於一種「微網誌」。不過就係因為用法簡單，又可以將零零碎碎嘅事同朋友分享，用戶數目同facebook不相伯仲。twitter喺歐美國家相當流行，唔少名人都係twitter粉絲，連ＮＢＡ球星都鍾意用twitter同球迷分享練波點滴。

其實早前發生嘅禮賓府家鬼同反高鐵事件，都顯示咗互聯網威力，亦反映咗成個煲呔曾班子完全同互聯網等新事物脫節。不過煲呔曾政府依然懶懶閒，除咗運輸及房屋局局長鄭汝樺肯開三小時facebook帳戶做假諮詢外，其他政策局連出嚟做場騷都唔肯。

今次煲呔曾畀馬國首相洩露行蹤，表面睇好似好小事，但間接露咗底，人哋一國首相都善用新科技，接受新事物，相反煲呔曾就似乎落後好多。香港已經畀上海同新加坡等周邊城市力追，如果煲呔曾再唔做番啲嘢，莫非香港要等佢落台先有希望？