國泰航空二○○九年康體錦標賽各項目冠軍得主已塵埃落定，其中室內划艇項目冠軍得主竟然係國泰行政總裁湯彥麟（Tony Tyler）。過去只係聽聞Tony奮力挽救國泰業績，甚少講佢有玩開室內划艇，今期《國泰天地》月刊就訪問咗Tony得獎感受，現年五十四歲嘅Tony好開心咁話，自己能夠戰勝血氣方剛嘅年輕一輩，感覺妙極喎！
Tony喺大學時代已開始學習室內划艇，但實際玩呢項運動大約有十年時間。室內划艇運動可以鍛煉到全身不同肌肉，但需要好大體力，難怪Tony為自己體力感到驕傲。至於有冇信心再接再厲，衞冕今年比賽冠軍，Tony好有信心話應該可以，但坦言好多對手以佢嘅成績為目標，相信再取勝會加倍困難，一定要下苦功先至得。今年錦標賽已經開始咗，睇嚟Tony又要積極練習備戰嘞！