本文重點
前民政事務局局長藍鴻震最近被跨國騙徒入侵電郵戶口，偽冒佢向全球各地親友發出求救電郵訊息，訛稱藍爺近日喺尼日利亞開會期間遇劫後身無分文，要求親友電匯三千五百美元（約二萬七千港元）到該地畀藍爺應急。雖然藍爺喺年初三晚已經去咗元朗警署報案，但可惜佢有位朋友已準備喺翌日（年初四）早上匯錢，好彩最後關頭睇完《東方日報》而逃過破財一劫。
險墮電郵騙財陷阱
卓妮尋日路過金鐘廊，巧遇電郵騙案受害人藍爺，講番起報案當日，原來佢正喺元朗朋友屋企歡度新歲，可能手機喺郊區接收唔穩定，好多收到求救電郵嘅朋友未能聯絡佢，打去佢屋企又無人聽，於是確信佢喺尼日利亞遇險，其中有個朋友更準備翌日早上匯錢，好彩匯錢前睇到《東方日報》有關「藍鴻震遭偽冒電郵騙財」嘅報道，最後先無匯錢破財。
藍爺話好感謝《東方日報》嘅報道，否則佢朋友無端破財，仲希望藉此呼籲市民注重電腦保安，以免網上受騙。可能藍爺對新正頭險累朋友墮騙案猶有餘悸，尋日着深色西裝、但戴咗頂紅色鴨嘴帽及頸巾嘅佢，話希望紅噹噹攞番個好意頭喎，又祝願香港市民虎年鴻運當頭同身體健康，同埋切記小心騙徒呀！
卓妮