棋哥愛捐窿捐罅搜尋香港美食，款式、口味轉不停，但講到品嘗精緻咕嚕肉，就只此一家，食足十幾年未覺厭。何解咁正？棋哥繪影繪聲描述話，啲咕嚕肉塊夠瘦又唔韌，外層脆漿好薄，口感鬆脆無比，酸甜汁亦調得啱啱好，入口唔濁鼻嗆喉，每次至少歎番十舊八舊至夠喉。

陸羽擁有逾七十年歷史，室內裝潢仍然古色古香，佢嘅咕嚕肉價錢跟番星級價，每碟盛惠一百一十蚊。卓妮平日同唔少名人傾開，陸羽都係唔少人心目中不可多得嘅食肆，不過由於佢名氣夠大，熟客又多，平日要喺度食餐晏，聞說訂位都唔係咁容易。