本文重點
人逢喜事精神爽，啱啱贏咗爭產官司嘅華懋集團主席龔仁心果然信守承諾，秉承家姐龔如心嘅遺願做更多善事，連捐錢都好事成雙，尋日龔家三姊弟妹首先捐一百萬畀受地震影響嘅海地災民，之後再捐一百四十萬元畀七十個受土瓜灣塌樓影響嘅家庭，即係話每個家庭都會收到一封兩萬蚊嘅大利是。今次係華懋贏官司後首次出擊做善事，相信陸續有來。
助塌樓家庭及海地災民
憑一句「天地有正氣」講到街知巷聞嘅龔仁心仲話，捐錢唔單止要照顧受塌樓影響嘅家庭經濟需要，更加要照顧佢哋嘅心靈需要，特別係農曆新年將至，正當每家每戶都到親友屋企拜年，就更加要畀呢啲家庭知道，喺現今富裕嘅社會，一直有人關心同幫助佢哋！
至於捐畀海地災民嗰一百萬元，其中五十萬元捐畀香港紅十字會，尋日由紅十字會總監兼國際及賑災服務管理委員會主席胡郭秀萍接收，其餘五十萬元則捐畀無國界醫生，捐贈儀式農曆新年後舉行。講開又講，立法會議員梁美芬尋日都同九龍城區議會主席王國強及一班該區區議員，探望受土瓜灣塌樓事件影響嘅居民，並送上禮物。