「甜瓜」安東尼傷愈復出即刻有料到，帶領金塊大勝小牛127比91，係小牛有史以來輸畀金塊嘅最大敗仗，金塊今季嘅「地獄主場」戰績勁，明早主場對馬刺，有力乘勝追擊！ （now 671周五早上11時30分直播）

因足踝受傷而缺陣８場嘅金塊主將安東尼，昨日復出表現不俗，取得19分及６次助攻，而金塊陣中亦有７人得分達雙位數，喺全場冇受考驗嘅情況下，大勝小牛36分，金塊今季主場成績為27戰23勝，要作客贏佢哋真係唔容易。

火箭後衞布魯克斯（中）巧妙避開熱火嘅巨人陣。 （美聯社圖片）	帝王阿根廷球員盧茲安尼（中）慘被紐約人左右夾擊。 （美聯社圖片）	騎士勒邦占士（左）入樽兼醒籃網易建聯一巴掌！ （美聯社圖片）

騎士鬥魔術有睇頭

聽日除咗金塊對馬刺呢場西岸大戰，另一場東岸大戰騎士主場對魔術亦睇頭十足，榜首嘅騎士尋日以104比97擊敗包尾嘅籃網，取得12連勝，「大帝」勒邦占士獨取32分及11個助攻，手風超順。

不過，魔術近況亦唔錯，主將杜域侯活同飛人卡特前日鬥黃蜂合共攻入73分，其中卡特近期更着晒火，遠投近射助攻樣樣有，今仗同「大帝」正面交鋒，兩雄相遇肯定有惡鬥。

本報綜合報道