本文重點
就快過新年，係時候換過晒屋企啲沙煲罌罉。「白花油王子」顏福偉都話要換煎Pan。顏公子對平底鑊有要求，佢前日買嘅一隻鑊，就係用納米技術製造、可以抵受高溫加上抗菌嘅優點於一身，價錢都不過係六百幾蚊。
顏公子早前因為非禮罪單官司抑鬱成病，仲患上人群恐懼症，連夜街都少出。轉做「住家男」嘅佢前日晏晝四點現身中環太子大廈，喺專營歐洲高級廚具用品嘅The PanHandler左睇右睇，原來係細心搜羅平底鑊。
傾偈單眼 五分鐘扑錘
店員見有貴客光臨，主動上前招呼，顏公子同店員有講有笑，傾偈傾到單晒眼，表情鬼馬。佢好爽快，揀咗五分鐘就扑錘購入韓國品牌「White Pan」嘅環保平底鑊，售價六百六十八蚊。
個平底鑊用納米陶瓷科技製成，不含有害化學物質，大大減低隻鑊加熱時容易釋放致癌物嘅問題。White Pan採用納米銀及納米鈦技術，具備抗菌功能，仲抵受到四百度高溫添，非常講究。
卓妮仲發現佢對白色情有獨鍾，連揀鑊都揀潔淨無瑕嘅白色，襯晒身上嘅白色Jacket，不愧為白花油王子。買完心水鑊後，卓妮上前打招呼，顏公子顯得錯愕。
卓妮問佢點解要買平底鑊，佢沉默半晌話：「放喺屋企自己用。」卓妮再想追問佢近況，平日健談嘅顏公子反問卓妮：「點解你會喺度嘅?」
卓妮