中國人壽（海外）喺香港已經成立二十五年，但係市民始終識買佢哋嘅股票多過買保險。不過自從前年國壽董事長楊超派愛將劉廷安落嚟揸旗之後，情況已經唔同晒。劉總畀足心機令公司更加融入香港，連個胃都投粵菜一票添！
上星期卓妮喺灣仔北海中心利苑見到劉總，原來劉總公司就喺對面，因地利之便，佢經常幫襯附近嘅潮州菜館佳寧娜同埋利苑。當晚佢叫咗佢最欣賞嘅響螺燉湯、海參伴百靈菇同埋臘味煲仔飯，果然係識食之人。
卓妮見到同枱食飯嘅中銀國際副執行總裁謝湧海，原來佢啱啱被劉總延攬做獨立非執行董事，睇嚟劉總執正間公司嘅決心好大，大家不妨拭目以待。
講番喺證券界好出名嘅謝湧海，依家中銀國際管理嘅資金已高達八百億港元，係香港數一數二大投行。國壽海外依家都有二百七十幾億元喺香港投資，淨係兩個人經手嘅錢銀已經過千億元，真係唔講得笑！
卓妮