娥姐光哥 麻煩多多

楊師傅以立春八字推算香港虎年運程，八字屬「金木反剋，比劫爭財，木旺土虛，為官神傷」。今年八字共有四個木、兩個土及兩個金，獨欠水和火，本應四木剋兩土可生財，可惜財星無火去生旺，變成「比劫爭財，僧多粥少」局面，又係人多失業，好可能四個人爭兩份工、係生意難做嘅一年。八字亦屬「金木反剋」格局，「金」可代表車輛，而「木」代表人，金剋木意味着虎年交通意外頻生，尤其係以大型車輛撞倒人群嘅意外較多。

至於「木旺土虛」，楊師傅指格局代表官員沒有強土支撐，為官或從政者只係表面威風，並無實幹才華，上月底不幸發生馬頭圍道塌樓傷亡慘劇，矛頭直指發展局局長林鄭月娥，睇嚟仲有大把手尾要跟。楊師傅話，娥姐八字從殺格，庚寅年大運在戌，寅戌半火局，寅已刑，屬於「損兵折將」局面，即被不濟嘅下屬連累，或會削弱政府民望，但對佢個人仕途無損。從全年運勢推測，娥姐農曆三月官星來合，可有一番作為，但到七、八月運勢會較為波動，雖然整體而言有驚無險。

另一位要小心嘅高官就係保安局局長李少光。光哥六十二歲轉行寅運沖堤崗，整個八字動搖必有大事發生，農曆三月有遠行之兆，六、九及十二月都係麻煩多多嘅月份，其中五月要小心健康。光哥喺牛年已經被遊行示威、八十後圍堵立法會及禮賓府保安搞到頭昏腦脹，虎年政府要搞五區補選等連串棘手問題，唔知又有幾多衝突要應付，光哥好難置身事外。

最後要批嘅係政務司司長唐英年，八字推斷佢今年係忙中有錯嘅一年，正月已經不吉，八月又沖夫婦宮，九月則吃力不討好。面對社會經濟及失業問題，加上司局長運勢遇阻滯，睇怕煲呔曾虎年都係疲於奔命，唔到佢唔醒醒定定做人！