先施百貨董事總經理馬景煊（Philip）同太太Vera兩公婆不但外形相襯，食嘢都一樣好啱嘴形。Vera話佢哋最鍾意食日本菜，四季酒店嘅稻菊係熱門蒲點之一。稻菊係世界有名日本餐廳，三年前佢哋進駐四季後，即時成為社會名流飯堂。卓妮聽一位日本總廚級朋友形容，稻菊江湖地位其來有自，佢哋有成一百五十年歷史，喺Tempura製法方面仲自創門派，叫做「天扶良」添。
Vera就話佢最鍾意食稻菊鐵板燒同魚生，而老公除咗情迷日本菜之外，都仲有個「中國胃」，佢喜歡中菜，經常幫襯中環私人會所馬車會。Vera讚佢哋嘅蒸魚一流，係Philip必食之選。
Philip就自爆，雖然佢食嘢方面同老婆好夾，但最大唔同就係老婆大人勁食辣椒，佢就完全食唔到辣。卓妮知道馬車會有好醒胃嘅豉油指天椒，實好啱Vera胃口啦！
卓妮