本文重點
「阿一鮑魚」楊貫一最近忽然進軍高檔日本菜，喺尖沙咀i-Square（國際廣場）廿九樓開設阿一海景飯店暨八重菊（YAEGIKU）日本料理，仲重金禮聘喺稻菊日本料理工作多年嘅老師傅助陣，尋日正式開張。其實一哥對日本菜並不陌生，多年來去日本搜購靚鮑魚街知巷聞，每次買貨均獲當地人夾道歡迎，佢最愛就係藍鰭Toro（吞拿魚腩）及天婦羅。
肥仔張葉澍堃撐場
一哥鍾意日本菜夠健康，於是約埋兄弟班試吓經營，雖然高昂嘅人工同舖租帶來好大挑戰，但佢自言喺內地有一定知名度，相信可吸引到內地客來港幫襯。「八重菊」主打刺身及鐵板燒，有活蝦刺身、宮崎和牛厚燒、沖繩活大竹蝦、特大牡丹蝦、北海道葡萄蝦、松島蠔等。喺八重菊用膳，仲可以欣賞維港無敵大海景添！
尋日一哥新店開張，飲食界立法會議員張宇人（Tommy）及新一代食神葉澍堃等一眾名人好友齊齊捧場試菜，Tommy食到唔停得口，猛咁叫助手試吓啲鮮蝦，Tommy放得入口嘅食物，已經係信心保證啦！
卓妮