教育局局長吳克儉尋日出席公開活動後，主動開腔就林慧思老師爆粗罵警一事解畫。吳局長一個箭步走到傳媒採訪區，更搶閘主動提起林老師事件，全程應對如流，明顯係有備而來。原來佢手持講稿，難怪信心十足。點知一個突如其來嘅問題就將吳局長技術性擊倒，當被問到當局有無就今次事件收到投訴嘅時候，佢衝口而出就話：「我啱啱放完假，需要時間去了解下。」佢唔係啱啱至去完新加坡同墨爾本嘅外訪考察行程咩？究竟佢係去外訪定放假呢？教育局新聞秘書後來澄清局長真係去外訪。
