早前個人資料私隱專員公署畀審計報告狠批亂用公帑同行政混亂，話佢哋租貴價辦公室，又指私隱專員吳斌出差唔住免費酒店亂使錢，處理投訴又唔達標，鬧到佢哋一戙都無。點知尋日吳斌對傳媒講，其實私隱署唔係大花筒，仲話審計署報告入面其實有好多對公署嘅正面回應，佢自己睇到之後好開心，認為審計署係肯定佢哋嘅表現，睇嚟審計報告點鬧都無乜辦法令佢哋檢討，佢簡直係超級阿Ｑ。
另外，吳斌為咗證明自己唔大使，話早前有個高級職員離職，公署遲遲都請唔到人，最後上年度有一筆預定支出無用到，仲撥咗入儲備基金。吳斌話如果畀着其他政府部門，為咗唔想政府見到自己有錢剩，點都會使晒啲錢先交報告，公署肯將啲錢留番嚟儲起佢，就證明佢哋係慳家。
其實使用公帑嘅規矩寫得好清楚，如果係用嚟做僱員薪金嘅錢，唔可以用喺其他地方，公署係咪真係咁有心慳家，大家心裏有數啦！