【本報綜合報道】中國前鋒易建聯打出ＮＢＡ代表作，阿聯自從復出後狀態高企，尋日更打出加盟ＮＢＡ三季以嚟嘅代表作，包括平最高得分廿九分在內，合共造出五項個人新高；可惜籃網於最後一節失準，最終主場以八十九比一○五不敵雷霆寫下十連敗。

尋日已經係阿聯復出後第三場賽事，前兩仗佢分別攻入廿二及十七分，表現不俗，估唔到今場遇上雷霆幾乎成了內線霸王，全場廿射十一中得廿九分，平個人生涯得分新高；此外廿次起手次數，半場攻入十八分及九次罰球起手次數亦分別刷新了個人新高，七個罰球命中就平了個人最高紀錄，所以單係今場已造出了五項個人之最。

造出五項個人新高

賽後不少美傳媒都對阿聯作出高度評價，其中ＥＳＰＮ更指籃網雖然輸波，但阿聯絕對屬一大亮點，不過阿聯就似乎唔多在意個人紀錄：「在比賽中已發現自己平了個人得分等紀錄，但比賽輸了就甚麼都沒有意義。」

阿聯今日足足打了四十二分鐘，係今季上陣時間最長嘅一仗，幸好佢賽後表示問題不大，亦唔覺太疲累，似乎傷患已經好番晒。

雷霆今場贏在第四節較籃網穩定，後者單節僅攻入十三分，而阿聯亦再一次指出球隊仲未有一個穩定嘅心去打足全場比賽，所以仍要有所加強。不過雷霆主將杜蘭特今場確有驚人表現，全場廿二射十五中轟入四十分，籃網守唔住佢先係輸波關鍵。