呢，港府行政會議十足好似走晒音嘅樂隊，你有你唱，佢有佢噏，亂晒大龍，市民都唔知聽邊個至啱。行會成員鄭耀棠尋日被問到，點解成日同港府唱對台戲。你估佢點答？佢話喎，自己係工會出身，對一啲問題嘅睇法根深柢固，有時會衝口而出，「唔覺意、唔小心」同政府唱反調。咁即係講嘢唔經大腦，隨口亂噏啦。佢仲話煲呔曾冇特別警誡佢，只係「提一提算數」。

唉，平民百姓衝口而出就話問題唔大啫，但鄭耀棠身為行會成員，講嘢唔經大腦，咁就大件事喇。孔子話齋，「君子欲訥於言而敏於行」，行會成員等於內閣成員，應該一言九鼎至係，點可以好似生草藥咁，噏得就噏㗎！

話時話，行會成員爆響口，公開同港府唱反調，已經唔係一次兩次，玩「香港亂噏」嘅亦唔係一個兩個，佢哋嘅言論往往涉及極具爭議嘅敏感議題，引起社會好大反應。

嗱，早排港府呢頭話到明唔會復建居屋，嗰頭行會成員張炳良同鄭耀棠就企出嚟公開贊成復建居屋，鄭耀棠玩得仲「激」，建議恢復定期賣地添，擺明要同港府作對，挖港府牆腳。

仲有呀，較早前公務員爭取加人工嘈到拆天嗰陣，鄭耀棠居然火上加油，明剃港府眼眉，公開反對高級公務員減薪。更離譜嘅係，連身為行會召集人嘅梁振英都玩埋一份，佢舊年就曾經走出嚟唱衰政府，話推行咗十八個月嘅工資保障運動已經「失敗」，咁仲唔係添煩添亂？

按《基本法》規定，行政會議負責「協助行政長官決策」，角色重要，謹言慎行係最基本要求。況且，行會實行集體負責制同保密制，既然入得行會，就要食得鹹魚抵得渴，無論係乜嘢身份，代表邊個階層，都要嚴格遵守遊戲規則。如果連最基本嘅遊戲規則都守唔到，咁就無謂再戀棧啦。

講真，行會成員籠裏雞作反，公開同政府唱反調，喺港英年代根本唔可能發生。咁又難怪嘅，嗰陣港英係強勢管治，有能力統籌全局，駕馭手下。回歸之後，港府管治無方，施政無能，有口水冇政績，民望插水，一沉百踩，早已淪為跛腳鴨啦。加上煲呔曾其身不正，醜聞多多，自己都顧唔掂，又點管得掂嗰班各有政治盤算嘅行會成員吖。正所謂：行會失控，成員七嘴八舌；政府弱勢，香港七國咁亂。

咁多年來，本港經濟停滯不前，社會亂象不斷，周邊地區發展後來居上，咄咄逼人。本來外患不足懼，最慘係禍起蕭牆，十幾萬公僕離心離德，十幾個行會非官守成員各懷鬼胎，弱勢政府是非多，雜音更多，香港有乜法子唔亂吖。計功夫茶話齋，再咁落去，跛腳鴨遲早變臘鴨，一國兩制提早收檔。