最近煲呔曾同環境局局長邱騰華宣布政府將全面棄用傳統鎢絲燈膽，又透過派發現金券迫使市民跟政府轉用慳電膽，但原來立法會早已計劃喺兩年後落成嘅新大樓棄用傳統慳電膽，改用更慳電同環保嘅ＬＥＤ射燈，再次證明政府搞環保同推動其他政策一樣，都係慢成個社會幾拍！

煲呔曾喺施政報告提出派發慳電膽券，除咗被質疑明益親家之外，仲被批評藉詞加電費，亦有人質疑ＬＥＤ比傳統慳電膽更環保等等。立法會秘書長吳文華（Pauline）尋日向傳媒透露，佢哋正研究緊喺新大樓全面轉用ＬＥＤ，但由於ＬＥＤ嘅產品仍在不斷改進同跌價，最近仲有啲聲稱比ＬＥＤ更慳電嘅產品推出，所以佢哋都係要睇定啲再決定訂購邊款，務求做到最慳最環保。

Pauline除咗出盡法寶幫立法會慳電，喺招聘保安員方面亦絞盡腦汁。話說去年有位市民喺會議廳公眾席上揮刀自殘，立法會事後決定加強保安，請多三名保安員，仲特別將資歷要求由過往嘅十年保安工作經驗降至三年，希望吸引多啲更年輕力壯嘅應徵者，應付可能愈嚟愈多嘅類似肢體衝突，點知等到正式返工當日，竟然有兩人臨時甩底冇報到，令立法會失晒預算。

長毛嚇走保安應徵者？

至於係咪因為「長毛」梁國雄早前意外整傷咗位保安員，嚇怕應徵者，Pauline話兩者喺時間上就幾脗合，但真正原因只有當事人知道。最慘係早前又有另一名保安員喺抬走啲菜園村示威者時整親條腰，令保安人手捉襟見肘。秘書處最後惟有將空缺聘用條件稍為提高，希望今次唔會再有人甩底。新大樓地方大過依家好多，估計要再請多二十多名保安員，希望到時啲議員同示威者斯文啲，令秘書處易啲請人喇！