政情：黃士心想抱孫 阿囝要計劃
旅行好多時都會遇到窩心事，好似領隊幫吓團友拎行李，原來都可以加深團友印象。康泰旅行社董事長黃士心近年將業務交畀兒子黃進達（Jason）打理，自己就不時帶團外遊。佢自爆以前從來唔收貼士，所以可以堅持「有所為有所不為」，好似佢就最怕幫人捽藥酒。不過，就算佢肯捽藥酒，都未必個個肯受，佢個仔Jason就唔領情嘞。
Jason笑笑口話，如果自己整親之後由爸爸幫佢包紮，佢可能反而更加驚！不過，佢都賣口乖話，記得細個旅行時試過跌親整傷腳，爸爸好心急咁帶佢去醫院，反而令佢放心得多。康泰尋日搞聖誕派對，黃士心神采飛揚，仲同在場嘉賓提起女兒成為執業律師而非常安慰，但佢話仲未夠，暗示恨抱孫，仲話Jason唔可以咁自私，要快啲生番個等佢兩公婆有孫湊吓就差唔多。
玄學家叫去南北面國家
Jason收到指示後都不敢怠慢，表示會計劃，雖然定唔到具體時間表 ，但聽西洋玄學家鑌治教路，話去南北面國家對佢生育有利，覺得可以參考吓喎。